Presidenti turk Rexhep Tajip Erdogan ka deklaruar se Turqia pret që samiti i NATO-s që do të mbahet në Ankara muajin e ardhshëm të theksojë unitetin e aleancës, duke kërkuar njëkohësisht heqjen e kufizimeve në tregtinë e industrisë së mbrojtjes dhe përfshirje më të madhe të Ankarasë në nismat evropiane të sigurisë.
Gjatë një takimi me parlamentarë të vendeve anëtare të NATO-s në Stamboll, Erdogan tha se kontributi i Turqisë në sigurinë e Evropës shpesh është anashkaluar dhe se vendi i tij është i gatshëm të marrë pjesë në të gjitha projektet e mbrojtjes dhe sigurisë në kontinent.
Ai theksoi gjithashtu pritshmëritë e Ankarasë për mbështetje më të madhe nga aleatët në luftën kundër terrorizmit dhe në përpjekjet për t’i dhënë fund kryengritjes së Partisë së Punëtorëve të Kurdistanit (PKK), duke kërkuar ndarje më të drejtë të barrës brenda aleancës.
Sipas Erdogan, kufizimet në industrinë e mbrojtjes të vendosura nga SHBA dhe disa vende evropiane për shkak të mosmarrëveshjeve politike dëmtojnë frymën e NATO-s dhe pengojnë bashkëpunimin strategjik.
Ankaraja do të presë më 7–8 korrik 32 liderë të NATO-s, si dhe përfaqësues nga vende partnere në rajonin e Gjirit dhe Azi-Paqësorit, në një samit që zhvillohet në sfondin e tensioneve për shpenzimet e mbrojtjes dhe ndarjen e përgjegjësive brenda aleancës.
