Policia e Shtetit ka përditësuar të dhënat zyrtare lidhur me aksidentin e rëndë të ndodhur në autostradën Durrës–Tiranë, në segmentin e Qafë Kasharit.
Sipas njoftimit, si pasojë e aksidentit ka humbur jetën drejtuesi i mjetit, 36-vjeçari R. H., banues në Tiranë, ndërsa janë konfirmuar 12 persona të plagosur, prej të cilëve 7 ndodhen në gjendje të rëndë dhe 5 me dëmtime më të lehta.
Policia sqaron se një fëmijë i plagosur rëndë, i cili fillimisht është dërguar pa shenja jete në një spital privat, është reanimuar nga mjekët dhe më pas është transportuar në Spitalin e Traumës, ku ndodhet nën kujdes intensiv.
Autoritetet theksojnë se paqartësitë në informacionin fillestar janë shkaktuar nga situata e rënduar në vendngjarje dhe transportimi i të lënduarve në disa spitale njëkohësisht.
Grupi hetimor vijon punën për zbardhjen e plotë të shkaqeve të aksidentit.
