Në një aktivitet të zhvilluar për prezantimin e Programit Kombëtar për Përgatitjen e Biznesit për Integrimin në Bashkimin Europian, Kryeministri Edi Rama ka folur për mbështetjen që do t’u jepet sipërmarrjeve shqiptare në procesin e afrimit me tregun europian.
Ai theksoi se qeveria do të vijojë të ndihmojë bizneset, veçanërisht ato të vogla dhe të mesme, për t’u përshtatur me ndryshimet që sjell integrimi në BE.
“Këtu jemi për të ardhmen që nuk ndalet, sepse vjen, dhe për të shkuarën që nuk kthehet sepse ka ikur. Pikërisht për t’iu gjendur pranë bizneseve me të ardhmen që po vjen me shpejtësi në mënyrë të pandalshme, që është anëtarësimi në BE. Ne jemi angazhuar në krijimin e këtij programi kombëtar që do ta mbështesim edhe me ekspertizën, që do të angazhojë në funksion të programit ekspertë të mirë informuar dhe mirë përgatitur për të asistuar sipërmarrjen shqiptare. Mbështetja jonë për këtë kategori është domethënëse, që do të materializohet në ditët e ardhshme me hapjen e ‘Dyfisho ndërmarrjen tënde’”, tha Rama.
