Inspektorati Shtetëror Teknik dhe Industrial ka publikuar një raport një ditë pas rrjedhjes së gazit dje në një depozitë në Porto Romano duke shkaktuar frikë dhe panik te banorët e zonës dhe fëmijët që u larguan me shpejtësi.
Në raport theksohet se cisterna ku u konstatua rrjedhja është e kompanisë “Gaspower”. Kjo cisternë sipas ISHTI-it nuk kishte kontrollet e duhura, madje as miratim për transport mallrash të rrezikshëm.
Pesë janë shkeljet e konstatuara nga cisterna e automjetit. Ky është përfundimi në të cilin kanë dalë hetimet e Inspektoratit Shtetëror Teknik dhe Industrial.
Në lidhje me dokumentacionin tekniko-ligjore të çisternës së GLN-s të automjetit rezultojnë këto mangësi:
1 – Certifikatë konformiteti e cisternës e cila lëshohet nga nje Organ i miratuar.
2 – Certifikatë e miratimit për mjetet që transportojnë disa mallra të rrezikshëm e cila lëshohet nga nje Organ i miratuar (ADR).
3 – Certifikatë për transportin e mallrave të rrezikshëm e cila lëshohet nga Drejtoria e Transportit Rrugore.
4 – Policë për sigurimin e detyrueshëm të mbajtësve të mjeteve motorike për përgjegjësinë ndaj palëve të treta.
5 – Certifikatë e kalibrimit të sasisë të cisternës së GLN-s.
Në fund, ISHTI nuk merr masa, por jep vetëm detyra. “Subjektit Gaspower AL sha u la detyrë që të merren masa për boshatisjen e menjëhershme të çisternës së GLN-s, për pastrimin e territorit, monitorimin e çisternës së GLN-s si dhe ambientit për qark.
Çisterna e GLN-s të automjetit nuk duhet të përdoret pa u pajisur me të gjithë dokumentacionin tekniko ligjor” thuhet në njoftim.
