Ushtria izraelite ka pranuar se vrau “aksidentalisht” një adoleshent palestinez gjatë një operacioni në Jenin, në Bregun Perëndimor të pushtuar .
Ministria e Shëndetësisë e Autoritetit Palestinez njoftoi ditën e sotme për vdekjen e 16-vjeçares, Jaina Zakarna e cila u qëllua në kokë në një shkëmbim zjarri midis forcave izraelite dhe militantëve lokalë.
Zyrtar i lartë i qeverisë palestineze, Hussein al-Sheikh bëri thirrje për një hetim të menjëhershëm për “ekzekutimin e adoleshentit”, funerali i së cilës u mbajt disa orë më vonë në prani të qindra njerëzve.
“Nga hetimi paraprak dolëm në përfundimin se vajza e re u vra nga zjarri i paqëllimshëm i ushtarëve që synonin njerëz të armatosur në një çati në këtë zonë”, tha ushtria izraelite në një deklaratë.
Sipas familjes së saj, Jayna ka qenë në çatinë e shtëpisë së saj kur ka ndodhur shkëmbimi i zjarrit.
Ajo u gjet e vdekur pasi forcat izraelite u tërhoqën.
Ministri i Mbrojtjes i Izraelit Benny Gantz shprehu keqardhjen e tij për vdekjen e të miturit si dhe vdekjen e çdo personi që nuk është i përfshirë në terrorizëm.
Sipas Gjysmëhënës së Kuqe Palestineze gjatë këtij operacioni janë plagosur edhe 2 palestinezë të tjerë.
Ushtria izraelite tha se të dyshuarit vendosën pajisje shpërthyese dhe qëlluan mbi ushtarët.
Tre persona u arrestuan.