Presidenti turk, Recep Tayyip Erdogan iu ka kërkuar njerëzve në një zonë të goditur rëndë nga tërmeti në Turqi të kuptojnë vonesat e shpëtimit, mes zemërimit në rritje ndaj reagimit të qeverisë.
Gjatë një vizite në Adiyaman, Erdogan tha se lëkundjet dhe moti i keq nënkuptonin se “ne nuk mund të punonim siç do të dëshironim. Për këtë kërkoj falje”, tha ai.
Më shumë se 50 mijë persona dihet se kanë vdekur në Turqi dhe Siri pas tërmeteve të mëdha më 6 shkurt.
Ai vrau të paktën një person dhe plagosi më shumë se 100 njerëz në provincën Malatya, në veri të Adiyaman. Ekipet e kërkim-shpëtimit po përpiqeshin të gjenin disa njerëz që besohej se ishin të bllokuar nën ndërtesat e shembura, raporton BBC, transmeton Klankosova.tv.
Sipas Autoritetit të Menaxhimit të Fatkeqësive dhe Emergjencave të Turqisë (AFAD) ka pasur katër tërmete të reja dhe 45 pasgoditje me magnitudë 5-6 që nga dy tërmetet masive të 6 shkurtit.
Shefi i AFAD-it Orhan Tatar e përshkroi atë si “aktivitet shumë të jashtëzakonshëm”.
Banka Botërore thotë se tërmetet e 6 shkurtit shkaktuan rreth 34 miliardë dollarë dëme të drejtpërdrejta në Turqi, por kostoja e rindërtimit mund të jetë rreth dyfishi i asaj shifre.
Erdogan – i cili po kërkon rizgjedhjen si president në zgjedhjet që do të mbahen në qershor – ka vizituar disa nga zonat më të goditura. Vizita e tij në Adiyaman erdhi pas kritikave të forta për reagimin e urgjencës atje nga banorët vendas.
“Unë nuk pashë askënd deri në orën 14:00 të ditës së dytë të tërmetit,” i tha AFP-së në fillim të këtij muaji banori i Adiyaman Mehmet Yildirim.
“Pa qeveri, pa shtet, pa polici, pa ushtarë. Turp për ju! Na latë vetë.”
Fatkeqësia la 1.5 milion njerëz të pastrehë.
