Nesër festohet një nga datat më të rëndësishme për të gjithë besimtarët katolikë, Ringjallja e Krishtit.
Mbrëmjen e sotme në të gjitha kishat katolike të vendit mbahet mesha e shenjtë e vigjiljes të Pashkëve.
Në orën 22:00 ka nisur sonte mesha në Katedralen e Shën Palit në kryeqytet. Besimtarë të shumtë kanë mbushur Katedralen në kryeqytet për të ndjekur meshën e shenjtë, e cila drejtohet nga kreu i Kishës Katolike në Shqipëri, Imzot Arjan Dodaj.
Në meshë është e pranishme edhe ambasadorja e Shteteve të Bashkuara në vendin tonë, Yuri Kim.
Pashka (ose pashkët) është kremtimi më i madh i kalendarit liturgjik të Kishës Katolike Romake dhe të kishave të tjera të krishtera që kremtojnë Ringjalljen e Jezusit të Nazaretit ndodhur, sipas Besëlidhjes së Re, tre ditë pas vdekjes së tij në kryq.
Java para Pashkëve është quajtur Java e Shenjtë, dhe ajo përmban Tri Ditët e Pashkëve, që përfshijnë Të Enjten e Shenjtë, që përkujton Darkën e Fundit, Të Premten e Shenjtë, që përkujton kryqëzimin dhe vdekjen e Jezusit.
Në krishterimin perëndimor, Sezoni i Pashkëve, fillon të dielën e Pashkëve dhe zgjat shtatë javë, duke i dhënë fund me ardhjen e ditës pesëdhjetë.
