Padyshim që fitorja e Kavajës nga koalicioni i Sali Berishës ishte një surprizë, referuar disfatës në bastionet që konsideroheshin më të sigurta. Në fund, Redjan Krali që votuesit e nxorën nga bashkia vendosi që t’i japë dorën dhe të përqafojë fituesin, Fisnik Qosja. Por i riu të cilit Kavaja i besoi drejtimin e qytetit ka mjaft punë përpara.
Përpara investimeve duhet të mendojë për të shpëtuar bashkinë. Kjo bashki nuk kishte tregues pozitivë sa i përket të ardhurave dhe shpenzimeve. Raport i përgatitur nga Ministria e Financave në 2022-shin konkludonte se 35 bashki janë pa probleme serioze, 14 bashki me probleme, 10 bashki në vështirësi dhe 2 me probleme serioze, Kavaja dhe Vora.
Por në Kavajë sërish Edi Rama i besoi atij që e kishte çuar bashkinë në këtë gjendje dhe në fund humbi. Tashmë kryetarin e ri e pret një punë e madhe përpara. Lufta për të shpëtuar bilancet e bashkisë dhe beteja me qeverinë qendrore të drejtuar nga Edi Rama, i cili në fushatë deklaroi se nëse qytetarët zgjedhin kandidatët e Sali Berishës nuk do të bashkëpunojë.