Trupi i pajetë i 33-vjeçarit Alfons Kola nga fshati Kallmet i Lezhës, që u vra më 31 Maj me thikë nga bashkëfshatari i tij Petrit Gega në Itali ka mbërritur në Shqipëri dhe do të prehet të dielën e 11 qershorit në vendlindjen e tij Kallmet.
Gega u ndalua nga karabinierët rreth një orë pas krimit. Autoritetet i trokitën në derën e shtëpisë në Lonato, ku 52-vjeçari me profesion murator, jetonte me bashkëshorten dhe fëmijët.
Ishin kamerat e shumta të sigurisë në zonë që e identifikuan. Kamerat filmuan po ashtu momentin e sherrit fillimisht me fjalë e më pas goditjen disa herë të 33-vjeçarit me një thikë kuzhine.
Alfons Kola gjeti vdekjen disa orë më vonë në spitalin e Breshias ku u transportua me helikopter në gjendje të rëndë. Kola dhe Gega ishin të dy nga fshati Kallmet i Vogël i Lezhës, fqinj me njëri-tjetrin.
