Kryeministri Edi Rama ka reaguar për herë të parë pasi Greqia e injoroi duke mos e ftuar në darkën informale për integrimin e Ballkanit në BE. I pari i qeverisë në Tiranë thotë se nuk reagoi më parë për të mos shqetësuar mikpritësin Mitsotakis dhe të ftuarit e tij. Thotë se darka u përdor për t’i çuar mesazhe Shqipërisë dhe për këtë ndjen keqardhje.
Më tej, referuar mungesës së ftesës për të, thekson se e kupton presionin e palëve të tretë, por ka një mesazh për Mitsotakis. Edi Rama shprehet se në Samitin e Berlinit që do të mbahet në Tiranë në tetor nuk e imagjinon që të ftojë Presidenten e Greqisë përpara Mitsotakis, sikur bëri ky i fundit duke i çuar ftesën Bajram Begajt dhe jo kryeministrit të Shqipërisë për shkak të tensioneve për arrestimin e Fredi Belerit.
“Këtu është përgjigja ime për të gjithë ata, në Greqi, Shqipëri apo gjetkë, që komentuan në mënyra të ndryshme ose u hutuan nga mungesa ime në Athinë, por edhe për gazetarët që kërkuan mendimin tim dhe nuk morën përgjigje para ngjarjes. Arsyeja është e thjeshtë: nuk doja të shqetësoja mikpritësin dhe të ftuarit e tij, duke e shtuar zhurmën para se miqtë e mi të mirë të mbledhur në Athinë të përfundonin punën e tyre.
Jam i lumtur që Kyriakos mori iniciativën me liderët shumë të rëndësishëm dhe për të diskutuar të ardhmen evropiane të Ballkanit në sfondin e agresionit rus. Rajoni ka nevojë që Greqia të përfshihet më shumë në rrugën tonë të përbashkët. Unë i kam thënë gjithmonë atij apo miqve të tjerë grekë, duke e thënë publikisht në disa raste, se sinqerisht besoj se vendi i tyre ka një rol të natyrshëm për të luajtur në Ballkan duke pasur parasysh profilin dhe përvojën e tij në BE.
Shpresoj shumë që takimi të ishte produktiv dhe sigurisht, më mirë të mos e kisha parë darkën e përdorur për t’i dërguar Shqipërisë një mesazh kontradiktor kundrejt qëllimit shumë më ambicioz të nismës dhe shpresoj që ky fakt fatkeq të mos ngatërroi të nderuarit e ftuar. Për sa më përket mua, të flasësh, të komunikosh, të debatosh me miqtë, aleatët, partnerët dhe fqinjët në radhë të parë është thelbi i politikës ndërkombëtare dhe të përpiqesh, gjithmonë të përpiqesh, të vendosësh veten në vendin e tjetrit është një domosdoshmëri.
Aq më tepër kur gjërat duket se shkojnë keq. Tetorin e ardhshëm Shqipëria do të kryesojë Samitin e Procesit të Berlinit të këtij viti në Tiranë. Natyrisht, miku im i dashur dhe kolegu shumë i respektuar në Athinë është ftuar të marrë pjesë dhe nuk mund ta imagjinoja kurrë duke ftuar në vend të tij Presidentin grek, për të cilin kam edhe respektin më të madh. Unë e kuptoj presionin e palëve të treta, të etur për të shfrytëzuar çdo rast.
Por ne të gjithë kemi sfida shumë më të mëdha përpara, ka male të vërteta për t’u ngjitur. Ajo që duhet të na bashkojë në kohë të tilla të trazuara për hir të popullit tonë, vendeve tona, rajonit tonë, Evropës tonë është më e madhe se ajo që na ndan. Shumë është në rrezik, që ne të bëhemi peng i politikës së brendshme” shkruan Rama.
