Policia e Kosovës ka njoftuar se ka gjetur trupin e pajetë të 91-vjeçarit, Ilaz Sejdiut i cili ishte shpallur i zhdukur prej ditësh.
I moshuari nga Ferizaj ishte zhdukur që nga data 17 gusht të këtij viti dhe trupi i tij i pajetë u gjet në vendin e quajtur “Shpella Burrnikut”.
“Sot, rreth orës 09:30 policia rajonale e Ferizajt ka pranuar një informacion se disa qytetarë në bjeshkët e fshatit Burrnik të Ferizajt, tek vendi i quajtur “Shpella Burrnikut” kanë gjetur trupin e pajetë të personit Ilaz Sejdiut (M/K) i moshës 91 vjeçar, i cili ishte zhdukur që nga data 17.08.2023 dhe ishte shpallur në kërkim.
Ekipe të policisë, krimteknikët dhe hetuesit rajonal janë në vendin ku është gjetur trupi i tij, ndërsa janë njoftuar Instituti i Mjekësisë Ligjore dhe prokurori kujdestar nga Prokuroria Themelore në Ferizaj, për veprime tjera hetimore”, thuhet në njoftim.
