Familjarët e Aleks Nikës, një nga viktimat e 21 Janarit i janë drejtuar Gjykatës së Lartë me një kërkesë që të rrëzojë dy vendimet e Shkallës së Parë dhe Apelit të Gjykatës së Posaçme Kundër Krimit të Organizuar dhe Korrupsionit që vendosën që të mos fillojnë hetimet për dosjen e bujshme.
Mark Nika, xhaxhai i Aleks Nikës ka depozituar kërkesën në Gjykatën e Lartë. Në dosjen që u dorëzua në SPAK dhe që kjo prokurori e çoi për kompetencë te Prokuroria e Tiranës për shkak se ka në dorë këtë hetim kërkohet rihapja e çështjes dhe hetimi i Sali Berishës, Lulzim Bashës, Ndrea Prendit dhe zyrtarëve të tjerë të zinxhirit komandues të Gardës së Republikës.
Familja e Nikës thotë se për më shumë se dy vite prokuroria e Tiranës nuk ka kryer asnjë hetim për dosjen dhe për këtë arsye kërkon që dosja të kalojë në Prokurorinë e Posaçme. Tani fjalën e ka Gjykata e Lartë.
