Shqipëria, e cila mban për herë të dytë presidencën e Këshillit të Sigurimit në OKB, pritet të drejtojë sot një nga seancat më të rëndësishme të Këshillit. Do të jetë vetë kryeministri Edi Rama që do të drejtojë këtë seancë të nivelit të lartë, fokusi i së cilës janë pasojat e agresionit rus, si dhe adresimi i nevojave aktuale dhe i atyre humanitare në të ardhmen.
Kryeministri Edi Rama ka folur sot përpara mbledhjes. Kreu i qeverisë theksoi se kjo mbledhje do t’i dedikohet thirrjes për paqe si dhe do vihet theksi që Rusia të rinisë marrëveshjen e grurit, për hir të qindra miliona njerëzve që vuajnë për ushqim dhe kërkojnë mbështetje nga Kombet e Bashkuara.
“Duhet të gjejmë zgjidhje të përbashkëta për çdo zgjidhje të ngutshme. Të ndihmosh Ukrainën sot të vetëmbrohet për të ndalur Rusinë sot përcjell mesazhin më të mirë, jep garancinë që ata që kërkojnë paqe e bashkëpunim. Do ta shfrytëzojmë këtë takim, për t’i ribëre thirrje Rusisë për të nisur marrëveshjen e grurit për hir të atyre qindra milionëve që kërkojnë ndihmë për ushqim e ndihmë nga Kombet e Bashkuara” tha Rama.
