Njëmbëdhjetë persona, përfshirë pesë fëmijë, u vranë në sulmet me raketa ruse S-300 të shtunën në rajonin Donetsk të Ukrainës , sipas administratës ushtarake lokale.
“Njëmbëdhjetë të vdekur, përfshirë pesë fëmijë, këto janë rezultatet paraprake të sulmeve në rrethin Pokrovsk. Rusët goditën zonën me raketa S-300, duke vrarë 11 persona dhe plagosur 8 të tjerë”, tha Vadym Filashkin, kreu i administratës ushtarake të rajonit Donetsk.
“Armiku godet në mënyrë cinike civilët, duke u përpjekur të sjellë sa më shumë pikëllim në tokën tonë” shtoi ai.
Donetsk është në vijën e parë të luftimeve në lindje dhe është pjesërisht i pushtuar nga forcat ruse.
Shërbimi Shtetëror i Emergjencave të Ukrainës (SES) tha se përpjekjet e kërkim-shpëtimit në zonën e sulmeve, të cilat shkatërruan plotësisht tre shtëpi private, janë duke vazhduar.
Presidenti i Ukrainës, Volodymyr Zelensky, u shprehu ngushëllime familjeve që humbën të dashurit e tyre.
“Rusia duhet të ndiejë gjithmonë se asnjë nga këto sulme nuk do të jetë pa pasoja për shtetin terrorist. Ne duhet ta sigurojmë këtë me forcën tonë, me aftësitë tona mbrojtëse dhe politike”, tha Zelensky.
