Greqia po bën gati sanksionet kundër Shqipërisë. Kështu shkruan gazeta greke “Kathimerini” pas vendimit për kryetarin e zgjedhur të Bashkisë së Himarës, Fredi Beleri.
Gazeta nënvizon se Athinës i është bërë presion i madh nga SHBA dhe BE që të ndryshojë qëndrimin ndaj Tiranës për këtë çështje dhe se ky presion mund të dyfishohet nëse “Qeveria greke ndjek këshillën e disa politikanëve për të vendosur sanksione dypalëshe”.
Autori Vassilis Nedos shkruan se qëndrimet e Perëndimit për këtë çështje kanë të bëjnë me faktin se Shqipëria e Edi Ramës po shfaqet si vendi më antirus mes vendeve të Ballkanit, çka po interpretohet si e drejtë për të injoruar presionin grek.
Gazeta thotë se për Greqinë duket se ka dështuar edhe marrëveshja për ndarjen e kufijve detarë me Shqipërinë, që mund të shërbente si një shembull i mirë për të negociuar në të njëjtën çështje edhe me Turqinë.
