Presidenti ukrainas Volodymyr Zelensky tha se propozimi i Rusisë për një armëpushim të përkohshëm dhe të kufizuar është një taktikë nga Rusia për të fituar kohë.
Zelensky tha se propozimi për një armëpushim dy ose tre ditor për të mbledhur ushtarët e rënë nga fusha e betejës synon të vonojë sanksionet e SHBA-së.
“Mendoj se janë budallenj, sepse, në parim, një armëpushim synon të sigurojë që të mos ketë viktima. Kjo është arsyeja pse dua vërtet që partnerët tanë amerikanë të marrin masa të forta dhe të dërgojnë një paketë sanksionesh në Senat, për të ushtruar presion mbi rusët që të ndalojnë armiqësitë me sanksione të forta. Ata nuk kuptojnë asnjë mënyrë tjetër. Dhe ne besojmë se kjo është e drejtë. Në fund të fundit, kanë kaluar tre muaj që kur SHBA-të dhanë sinjalin për një armëpushim të plotë dhe ne i mbështetëm ata”, shtoi Zelensky.
