Gjykata e Shkallës së Parë në Tiranë ka vendosur të mos pranojë kërkesën e Gjon Shkambit për zëvendësimin e masës së sigurisë “arrest me burg”, në lidhje me ngjarjen e rëndë të ndodhur brenda ambienteve të gjykatës, ku humbi jetën gjyqtari Astrit Kalaja dhe u plagosën dy persona të tjerë.
Në seancën gjyqësore, Shkambi ka mohuar çdo përfshirje në ngjarje, duke deklaruar se nuk kishte dijeni për veprimet e nipit të tij, Elvis Shkambi, i cili akuzohet si autor i të shtënave.
Pavarësisht pretendimeve të tij, gjykata ka vlerësuar se rrethanat aktuale nuk e justifikojnë lirimin nga paraburgimi.
Vendimi i sotëm lë në fuqi masën e sigurisë së mëparshme, ndërsa hetimet për ngjarjen vijojnë. Elvis Shkambi ndodhet gjithashtu në paraburgim dhe deri më tani nuk ka bërë kërkesë për ndryshimin e masës së sigurisë.
Nga e njëjta ngjarje mbetën të plagosur Ragip dhe Ervis Kurtaj, të cilët ishin palë në çështjen gjyqësore që po shqyrtohej në momentin kur ndodhi tragjedia.
