Kryetari i Partisë Demokratike, Sali Berisha, pas kthimit nga Brazili ku mori pjesë në punimet e Asamblesë së Internacionales Demokrate të Qendrës (CDI), zhvilloi një konferencë për media në selinë blu.
Ai informoi mbi diskutimet e organizatës dhe vendin që, sipas tij, iu kushtua situatës politike në Shqipëri.
“Sot jam para jush për të informuar mbi rezultatet e punimeve të Asamblesë së CDI-së në São Paulo, ku Shqipëria ishte një nga temat qendrore të diskutimeve. Në këtë forum, përveç çështjes së Ukrainës dhe situatës në Venezuelë, u trajtua edhe ajo që unë e kam quajtur ‘narkoshteti shqiptar’. Pas paraqitjes së rezolutës për Shqipërinë, personalitete të ndryshme shprehën shqetësime për zhvillimet në vend dhe, siç u theksua në diskutim, për konsolidimin e një modeli që unë e lidh me drejtimin e Edi Ramës. Në konferencë u përmendën edhe pretendime për lidhje me kartelet e Amerikës Latine, çka është reflektuar në debatet e organizatës.”
