Sali Berisha, lideri i Partisë Demokratike, mbajti një fjalim të ashpër para Kryeministrisë, ku u shpreh me tone të forta kundër qeverisjes së Edi Ramës.
Gjatë fjalës së tij, Berisha theksoi se qëllimi i tij dhe i partisë së tij është të çlirojnë Shqipërinë nga një regjim që sipas tij është bërë më i rrezikshëm dhe më i dëmshëm për qytetarët shqiptarë.
Ai e cilësoi Edi Ramën si një njeri që është tërësisht i lidhur me krimin dhe ka përdorur çdo mundësi për të shpëtuar veten, ndërkohë që shqiptarët po përballen me varfëri në rritje dhe pasiguri të mëdha.
“Edi Rama është bërë për çdo shqiptar më armik, më i rrezikshëm se kurrë më parë. Me vendimin që mori për të mbrojtur dosjen e tij dhe atë të Lulzim Ballukut, ai tregoi se është i gatshëm të bëjë çdo gjë për të shpëtuar lëkurën e tij. Rama është i lidhur ngushtë me krimin dhe ka shndërruar partinë e tij në një organizatë kriminale. Por ne nuk do ta pranojmë kurrë që ky njeri të mbajë peng shqiptarët dhe Shqipërinë. Bashkohuni me ne në këtë betejë për votën e lirë dhe dinjitetin e shqiptarëve.”
