Ambasadori i Iranit në Kombet e Bashkuara, Amir Saeed Iravani, ka bërë thirrje të fuqishme për Këshillin e Sigurimit të OKB-së që të veprojë me urgjencë për të siguruar respektimin e armëpushimit në Liban nga Izraeli.
Iravani kërkoi ndërprerjen e menjëhershme të sulmeve ndaj civilëve dhe infrastrukturës civile, si dhe tërheqjen e forcave izraelite nga territori libanez.
Në deklaratën e tij, ai gjithashtu kritikoi sulmet e përbashkëta të SHBA dhe Izraelit ndaj Iranit, duke i cilësuar ato si shkelje të së drejtës ndërkombëtare, dhe dënoi operacionet ushtarake të Izraelit në Gaza, Bregun Perëndimor dhe Lartësitë e Golanit. Sipas tij, këto veprime janë një përshkallëzim i rrezikshëm i tensioneve në rajon.
Thirrja e Iranit vjen në një periudhë të paqartë dhe të tensionuar për stabilitetin e Lindjes së Mesme, ndërsa shtohet shqetësimi për përhapjen e mëtejshme të konfliktit në rajon.
