Një operacion policor në Maliq për kapjen e një personi të kërkuar është përshkallëzuar në përplasje të armatosur, duke sjellë pasoja të rënda për efektivët e Policisë së Shtetit.
Sipas drejtorit të Policisë së Korçës, Skënder Hitaj, ngjarja ka ndodhur gjatë ndërhyrjes në një stan, ku forcat e rendit i kanë bërë thirrje personit të kërkuar të dorëzohej, por situata ka degjeneruar në shkëmbim zjarri.
“Forcat e policisë kur kanë mbërritur në stanin e tij, ky person, i dënuar në 2017 me 11 vjet burg për veprën penale të prodhimit të narkotikëve, i kanë bërë thirrje që të dorëzohej, por ai ka hapur zjarr të menjëhershëm në drejtim të policisë. Si pasojë ka humbur jetën një efektiv dhe është plagosur një tjetër, të dy pjesë e FNSH-së në drejtorinë e Korçës. Është plagosur edhe autori, i cili është arrestuar”, u shpreh Skënder Hitaj.
