Trajneri i Kombëtares shqiptare, Rolando Maran, ka folur në prag të miqësores ndaj Luksemburgut që do të luhet në “Air Albania”, duke theksuar se skuadra është ende në fazë përshtatjeje me idetë e reja të stafit teknik.
Sipas tij, në paraqitjet e para të kuqezinjve janë vënë re si elementë pozitivë, ashtu edhe mangësi që kërkojnë përmirësim, gjë që ai e konsideron normale duke pasur parasysh kohën e shkurtër në drejtim të ekipit.
Maran u ndal edhe te mungesa e efikasitetit në ndeshjen e fundit, duke theksuar se ekipi ka krijuar raste, por nuk ka qenë i saktë në finalizim. Ai shtoi se prioritet mbetet përmirësimi i organizimit taktik dhe funksionimi i skuadrës si një bllok i vetëm, si në sulm ashtu edhe në mbrojtje.
Trajneri theksoi gjithashtu nevojën për më shumë kujdes në presing dhe në mbulimin e hapësirave, ndërsa paralajmëroi se Luksemburgu nuk duhet nënvlerësuar.
“Ndeshja është e rëndësishme jo vetëm për rezultatin, por edhe për përgatitjet e sfidave të ardhshme. Duhet të jemi maksimalisht të përqendruar”, u shpreh ai.
Sa i përket gjendjes së lojtarëve, Maran konfirmoi se Myrto Uzuni është i gatshëm, ndërsa Anis Mehmeti ka pasur shqetësime shëndetësore për shkak gripi.
