Kryeministri Edi Rama ka folur sërish për protestat që po zhvillohen në vend, duke i cilësuar disa prej sjelljeve gjatë tyre si presion ndaj qytetarëve me mendime të ndryshme dhe si, sipas tij, “frymë fashiste”.
Në episodin e sotëm të podkastit “Flasim”, Rama tha se është e papranueshme imponimi ndaj mendimit ndryshe.
“Fryma fashiste nuk ka nevojë për uniforma dhe për armë. Fryma fashiste është fryma që thotë: ‘Shqipëria është e shqiptarëve’, pra të gjithë të tjerët jashtë nuk janë të mirëseardhur. Siç ishte Gjermania e gjermanëve dhe u bë ‘delja e zezë’ e Europës për vite, vite të tëra pastaj. ‘Greqia është e grekëve’, thoshin këta hajvanët e Agimit të Artë, që u bënë një problem për Greqinë, e të tjera, e të tjera, e të tjera. Fryma fashiste është kur ti thua: ‘Unë dua të flas, unë dua të them atë që mendoj, unë dua të protestoj, unë dua të rri në bulevard’, por nuk pranoj që të tjerët të kenë një opinion apo një qëndrim tjetër. Është e patolerueshme që një grup njerëzish, një parti apo një konglomeratë partish t’i imponohet pjesës tjetër duke i thënë: ‘O do mendosh kështu si unë, o unë do të të sakatoj, do të të bullizoj, do të të kërcënoj’. Kjo është fashiste, është skandaloze dhe kjo duhet ndalur.”
