Presidenti i Ukrainës, Volodymyr Zelensky, ka vlerësuar vendimin e Kanadasë për të miratuar një paketë të re sanksionesh ndaj Rusisë, që synon mbi 160 subjekte të lidhura me të ashtuquajturën “flotë në hije” të Moskës.
Ai e cilësoi këtë hap si të rëndësishëm për rritjen e presionit ekonomik ndaj Kremlinit dhe për forcimin e mbështetjes ndërkombëtare ndaj Ukrainës.
“Jam mirënjohës ndaj Kanadasë për paketën e saj të re të sanksioneve kundër më shumë se 160 subjekteve të lidhura me flotën në hije të Rusisë. Sot, gjatë takimit tonë me Mark Carney, diskutuam forcimin e presionit të sanksioneve ndaj Rusisë. Dhe është e rëndësishme që vendime të tilla të merren. Temat e bashkëpunimit në mbrojtje, pjesëmarrja e Kanadasë në financimin e prodhimit të dronëve ukrainas sipas modelit danez dhe bashkëpunimi në sektorin e energjisë… E falënderoj Markun për qëndrimin e tij të fortë gjatë takimit G7-Ukrainë dhe për gjithë mbështetjen për popullin tonë.”
Zelensky theksoi gjithashtu se Kanadaja do të vazhdojë mbështetjen për Ukrainën në fushën energjetike dhe në procesin e rimëkëmbjes së vendit, duke e konsideruar këtë ndihmë jetike në kushtet e luftës. Ai shtoi se bashkëpunimi me aleatët mbetet vendimtar për forcimin e kapaciteteve mbrojtëse të Ukrainës.
