Ministri i Jashtëm i Rusisë, Sergej Lavrov, ka akuzuar Bashkimin Evropian se po shkon drejt një strukture gjithnjë e më të militarizuar dhe se po ndërton politika sigurie të drejtuara kundër Rusisë.
Deklaratat e tij u bënë në Moskë pas një takimi me homologun turk Hakan Fidan, ku ai komentoi zhvillimet në marrëdhëniet mes Perëndimit dhe Rusisë, si dhe diskutimet për zgjerimin e BE-së me Ukrainën.
“Tani që ka një ftohje të qartë në qëndrimin e administratës së Donald Trump ndaj Evropës për sa i përket kontributit të Uashingtonit në siguri, siç e dini, ka disa tendenca brenda BE-së. Njëra është thjesht shndërrimi i BE-së në një bllok ushtarak të pavarur”, tha Lavrov në konferencën për shtyp në Moskë pas takimit me homologun e tij turk Hakan Fidan.
Ai shtoi më tej se këto zhvillime janë ende në fazë diskutimesh, por sipas tij pas tyre fshihet një qëllim i qartë: “E gjithë kjo është ende në fazën e shqyrtimit, diskutimeve dhe ideve. Por pas gjithë kësaj qëndron një e vërtetë e qartë, BE-ja po ndërton të gjitha strukturat e saj për forcimin e sigurisë kundër Rusisë.”
Lavrov pohoi gjithashtu se Britania po nxit diskutime për një aleancë të veçantë ushtarake që mund të përfshijë Mbretërinë e Bashkuar, Ukrainën dhe disa vende të BE-së që ai i cilësoi si më “anti-ruse”, duke shtuar se këto janë ende vetëm ide në diskutim.
