Për të 19-ën ditë radhazi, qytetarë të shumtë janë mbledhur këtë të enjte në qendër të Tiranës, në vijim të protestës jopartiake që po zhvillohet prej javësh në kryeqytet.
Tubimi ka nisur në sheshin “Skënderbej”, ku qytetarët janë grumbulluar fillimisht, për të vijuar më pas me marshimin përgjatë bulevardit “Dëshmorët e Kombit” në drejtim të godinës së Kryeministrisë.
Në përfundim të marshimit, organizatorët kanë parashikuar mbajtjen e fjalimeve para institucionit qeveritar, ku pritet të përcillen mesazhe dhe kërkesa drejtuar autoriteteve.
Ndryshe nga ditët e mëparshme, protesta e sotme ka nisur në orën 19:00, një orë më vonë se zakonisht, sipas njoftimit të organizatorëve, për shkak të kushteve të temperaturave të larta gjatë ditës.
