Nga Kryesia e Kuvendit, deputeti i Partisë Demokratike Klevis Balliu ka akuzuar qeverinë se po përdor procesin ligjvënës për qëllime politike dhe personale të kryeministrit Edi Rama.
“Në vend që të përmirësohen kushtet e punonjësve të Gardës së Republikës, po ndryshohet ligji për të hequr kriteret ekzistuese dhe për të lehtësuar emërime të drejtpërdrejta nga kryeministri,” tha Balliu.
Ai theksoi se efektivët e Gardës përballen prej vitesh me paga të ulëta dhe vështirësi në punë, ndërsa sipas tij ndryshimet e propozuara përbëjnë një rrezik për institucionet dhe dëmtojnë shtetin ligjor. Balliu shtoi se kjo qasje tregon, sipas tij, trajtimin e institucioneve si mjete politike dhe jo si struktura të pavarura të shtetit.
