Ish-ministri i Mbrojtjes, Anton Quni, thotë se nëse llogaritet miqësia tradicionale ndërmjet Serbisë dhe Rusisë, është e natyrshme që të pritet ndonjë veprim dhe zhvillim i cili mund të tensionojë situatën edhe në veri të Kosovës.
Ai tha se në këtë rast është i rëndësishëm koordinimi me institucionet e sigurisë me prezencën ndërkombëtare ushtarake me KFOR-in.
“Tani nga komuniteti perëndimor, nga vendet demokratike dhe të civilizuara cilësohet operacioni ushtarak nga Rusia në Ukrainë si agresion. Dhe kur një shtet ndërmerr një veprim të tillë natyrisht që për të siguruar suksesin e operacionit është interesuar që të ketë sa më pak kundërshtarë. Këtë mund të arrijë duke krijuar edhe kriza të reja dhe të shpërqendrojë vëmendjen nga ai territor ku po zhvillohen operacionet”.
“Dhe nëse e llogarisim miqësinë tradicionale mes Serbisë dhe Rusisë është e natyrshme që të pritet ndonjë veprim dhe zhvillim i cili mund të tensionojë situatën edhe në Veri të Kosovës, por edhe më gjerë. Unë besoj që autoritetet shtetërore por edhe nga praktika ime e mëparshme si Ministër i Mbrojtjes në situata të tilla do të thotë se është një koordinim i mirë i institucioneve të sigurisë me prezencën ndërkombëtare ushtarake në këtë rast me KFOR-in. Po ashtu edhe një komunikim i veçantë me autoritetet e NATO-së dhe me partnerët strategjikë”, ka thënë Quni.
Deputeti i LDK-së nuk beson se Serbia do të ndërmarrë ndonjë veprim në Kosovë. Krahas kësaj, Quni thotë se Kosova duhet t’i ketë parasysh rreziqet e mundshme, por jo në ato përmasa sa të bëhet panik.
“Natyrisht që duhet të ketë forca në gatishmëri dhe të përgatitura mirë edhe për operacione. Unë prapë besoj se nuk do të ketë aventura të tilla nga ana e regjimit të Serbisë, pasi vlerësoj që edhe ata e kanë bindjen që një aventurë që është ndërmarrë nga Rusia mundet të kthehet shumë shpejt një bumerang për oreksin e Serbisë”, tha Quni.
