Presidenti rus, Vladimir Putin gjatë fjalimit në “Forumin Ekonomik Ndërkombëtar” në St. Petersburg ka marrë sërish shembull Kosovën duke përsëritur se Rusia ka të drejtë të njohë si të pavarura republikat e vetëshpallura në Donbas të Ukrainës.
“Kur Kosova u pavarësua, nën presionin e shteteve ndërkombëtare, Gjykata Ndërkombëtare e Drejtësisë deklaroi se nuk është shkel ligji ndërkombëtar i Kombeve të Bashkuara. Do të thotë se nuk duhet të pyetet qeveria qendrore për t’u pavarësuar.
Ky ishte një precedent. Ato shpallën pavarësinë. A kemi të drejtë t’i njohim? Sigurisht që po. Pas shpërbërjes së ish-Jugosllavisë dhe Bashkimit Sovjetik, Perëndimi iu kthye ndarjes së Kosovës nga Serbia.
Vendet perëndimore nisën luftëra në shkallë të gjerë, duke përfshirë Irakun, Libinë e Afganistan. Por puna është se situata të tilla u zhvilluan siç donin ata, dhe jo siç do të duhej” deklaroi ai.
