Presidenti i Kroacisë, Zoran Milanoviç, pozicionin e tij kundështues në raport me vendimin e Qeverisë kroate që Forcat e Armatosura e Ukrainës të stërviten në territorin kroat, e ka justifikuar me një shembull të çuditshëm.
“Kroacia ka detyrime vetëm ndaj NATO-s”, u shpreh fillimisht ai dhe shtoi: “Po sikur Kroacia të sulmojë Serbinë dhe të hyjë në luftë, a duhet të na ofrojë NATO-ja ndihmë dhe mbrojtje”?
Nuk kaloi shumë kohë dhe presidenti kroat e përmirësoi deklaratën e tij.
“Kroacia nuk do të sulmojë Serbinë dhe Serbia nuk do ta sulmojë Kroacinë, natyrisht, por këtë e them për të hequr qafe mashtruesit që flasin për disa detyrime kroate”.
Duke iu referuar Artikullit V të NATO-s ku thuhet se sulmi ndaj një anëtari të Aleancës, do ta konsiderohet sulm kundër të gjithëve, Milanoviç theksoi se “çdo rregull ka jetëgjatësinë e vet”.
“Unë e marr seriozisht këtë rregull, por ne kemi nevojë edhe për sjelljen tonë të arsyeshme për të mos hyrë në probleme më të mëdha sesa ato që na duhen”, u shpreh ai.
Ndryshe, ditë më parë shefi i shtetit kroat kishte deklaruar se nuk do ta mbështesë Misionin EUMAM Ukrainë sepse siç vlerësonte ai, “do të nënkuptonte përfshirjen e Kroacisë në luftë”.
Ai mohoi se ishte në dijeni që ministrat e jashtëm evropianë kishin dhënë idenë për të trajnuar 15 mijë ushtarë ukrainas në Evropë.
