Qëndrimi i Kryeministrit të Kosovës Kurti për krimin makabër që ndodhi mbrëmjen e djeshme në martenitetin e QKUK-së në Prishtinë, ku 35- vjeçarja Hamide Magashi u vra në mënyrë mizore nga ish-bashkëshorti i saj Sokol Halili, ka shkaktuar një sërë reagimesh. Kryetari i LDK-së, Lumir Abdixhiku përmes një postimi në facebook, komenton deklaratën e Kurtit duke thënë se ai po flet si analist e si opozitar, dhe se ende nuk e ka kuptuar që është udhëheqës i shtetit. Ndërsa, ka kërkuar nga Kurti që të kërkoi përgjegjësi të merr masa dhe të veproj.
“Një grua shtatzënë kishte urdhër mbrojtje. Shteti i udhëhequr nga ai, ka rënë në çdo drejtim. Përgjegjësi kërko Kryeministër! Merr masa, vepro. Për atë punë je aty”, ka thënë Abdixhiku.
Deputetja e PDK-së, Ganimete Musliu gjithashtu ka reaguar në një postim të bërë në Facebook, ka shkruar se “shqetësohet për shëndetin mendor të kryeministrit”.
“Kur i lexoj këto deklarata, unë seriozisht shqetësohem për shëndetin mendor të Kryeministrit të Kosovës!”, ka shkruar Musliu.
Në të njëjtën linjë ishte edhe kryetari i Aleancës për Ardhmërinë e Kosovës (AAK), Ramush Haradinaji i cili e ka fajësuar kryeministrin Albin Kurti për vrasjen makabër.
Në një postim në Facebook, Haradinaj ka shkruar se Kurti është është shndërruar në bashkëpjesëmarrës në krimet makabre që po ndodhin përditë.