Ish-kryebashkiaku socialist i Fushë Arrëzit Fran Tuci është lënë në burg pa afat me vendim të Gjykatës së Posaçme kundër Krimit të organizuar dhe Korrupsionit, nën akuzën e “Shpërdorimit të detyrës”.
Fran Tuci u arrestua 2 ditë më parë. Në arrest shtëpie do të hetohet administratori i Iballës Ndoc Marku dhe në kërkim u shpall Durim Markgjekaj, fadromist.
Gjithçka lidhet me hapjen e një segmenti të ri rrugor rural, të pa miratuar më parë nga autoritetet kompetente, nga ana e një shoqërie private.
Nga hetimet ka rezultuar se “në territorin nën juridiksionin administrativ të Bashkisë Fushë Arrëz, në kundërshtim me të gjithë kuadrin ligjor në fuqi, është hapur një segment i ri rrugor rreth 1.8 km dhe gjerësi rreth 5 m, i cili ka cenuar një sipërfaqe të konsiderueshme të fondit pyjor në pronësi të kësaj Bashkie si edhe ka dëmtuar rëndë terrenin që i përket këtij fondi pyjor”.
Vlerësimet e Inspektoratit të Mbrojtjes së Territorit flasin për një dëm prej më shumë se 2 milionë euro, të shkaktuar nga dëmtimi i terrenit dhe shpyllëzimi i sipërfaqes nga e cila është përfituar rruga e hapur privatisht.
