Seanca e sotme në parlament do të jetë e dedikuar për Kosovën dhe në fund pritet që të miratohet një rezolutë konsensuale për të cilët u ra dakord dje mes shumicës dhe opozitës. Por si u arrit në këtë pikë konsensuale? Ish-kryeministri Sali Berisha nuk dha detaje, por theksoi se kjo është arritje kombëtare.
“Për interesat e kombit shqiptar nga 2013 dhe deri sot kemi qenë në pozita të kundërta për qëndrimin ndaj Kosovës me Edi Ramën dhe PS-në. Sado jemi vëllezër nuk jemi shtet dual, por dy shtete të pavarura. Respektimi i vullnetit të zgjedhësve në të dyja shtetet është kusht themelor. Konsensusi shënon një arritje të madhe kombëtare.
U ra dakord që të mbështetet plotësisht rezoluta e Kosovës, nen për nen. Këtë priste cdo shqiptar që do këtë vend. Mund të thoni ju cfarë ndodhi? Aq sa mund ta merrni vesh se çfarë ndodhi me Ballkanin e Hapur, mund të merret vesh, por për ne rëndësi ka që deputetët do të votojnë rezolutën për parlamentin e Kosovës” tha Berisha.
