Presidenti Donald Trump përpara gazetarëve në Shtëpinë e Bardhë ka folur rreth tensioneve në Lindjen e Mesme. Trump shmangu mundësinë e përfshirjes së SHBA në konfliktin e Iranit me Izraelin. Ai u shpreh “nuk mund ta them këtë”.
“Mund të veproj, mund edhe të mos veproj. Askush nuk e di çfarë dua të bëj. Ajo që mund të them është se Irani ka shumë probleme dhe dëshiron të negociojë.”, shtoi Trump.
Presidenti theksoi se Teherani duhet të kishte treguar më shumë vullnet për negociata përpara sulmit të Izraelit.
Trump zbuloi gjithashtu se negociatorë iranianë kanë lënë të kuptohet se “mund të vijnë në Shtëpinë e Bardhë” për bisedime, ndonëse e cilësoi si një proces “të vështirë”. Ai nuk dha një përgjigje të qartë nëse do të ketë një takim të tillë, duke i lënë të gjitha opsionet të hapura.
Trump deklaroi se nuk është i sigurt “se sa do të zgjasë konflikti”, duke theksuar se mbrojtja ajrore e Iranit është thuajse e shkatërruar. “Dy fjalë të thjeshta: dorëzim pa kushte”, tha ai prerazi. “Jam lodhur.”
