Teksa presidentja e Komisionit Europian, Ursula von der Leyen, vlerësoi rrugën e Shqipërisë drejt Bashkimit Europian gjatë vizitës së saj në Tiranë, kryetari i Partisë Demokratike, Sali Berisha, u shpreh kritik ndaj progresit të vendit.
Në një konferencë për mediat, Berisha falënderoi Komisionin Europian për mbështetjen financiare dhe për anëtarësimin e Shqipërisë në SEPA, por theksoi se përveç pozicionit gjeostrategjik, Shqipëria nuk ka përmbushur kriteret e tjera thelbësore për integrim. Ai u shpreh:
“Gjatë qeverisjes së Edi Ramës u larguan nga Shqipëria vetëm në hapësirën evropiane 1 milion e 99 mijë qytetarë të këtij vendi.”
Berisha shtoi se Partia Demokratike mbështet fuqishëm integrimin në BE, por vetëm nëse ky proces bazohet në meritë, sundim të ligjit dhe ekonomi të tregut të lirë.
