Ministri italian i Mbrojtjes, Guido Crosetto, ka bërë të qartë se pranimi i anijeve ushtarake pranë Ngushticës së Hormuzit nuk nënkupton nisjen e një misioni të ri, duke qetësuar shqetësimet ndërkombëtare mbi një përshkallëzim ushtarak në rajon.
Ai theksoi se çdo veprim i ri do të kërkonte miratimin e parlamentit dhe një kuadër ligjor të posaçëm.
“Është një gjë t’i afrosh anijet më shumë me njëra-tjetrën dhe një tjetër t’i drejtosh ato drejtpërdrejt drejt Hormuzit,” tha Crosetto, duke shtuar se çdo mision i ri ushtarak duhet të planifikohet me autorizim të qartë dhe në përputhje me ligjin.
Ministri gjithashtu njoftoi se diskutimet për këtë çështje do të zhvillohen të mërkurën në parlament, ndërkohë që lëvizjet e anijeve pranë rajonit mund të jenë pjesë e operacioneve ekzistuese dhe jo një veprim i ri. Deklaratat e tij vijnë në një moment të tensionuar në Lindjen e Mesme, ku siguria detare dhe pasiguria mbi lëvizjet ndërkombëtare ushtarake kanë rritur shqetësimet e vendeve evropiane.
