Në mbledhjen e fundit të Kuvendit, Partia Demokratike ka ndërmarrë një paketë ndryshimesh në Statutin e saj, duke synuar një riorganizim të brendshëm më funksional dhe një përfaqësim më të zgjeruar në të gjitha nivelet e strukturës.
Këto ndryshime reflektojnë një përpjekje për të forcuar mekanizmat e demokracisë së brendshme dhe për të rritur gjithëpërfshirjen politike, veçanërisht për Diasporën shqiptare dhe përfaqësimin e grave në vendimmarrje.
Sipas vendimit të Kuvendit, risitë kryesore përfshijnë:
- Fuqizimi i Diasporës shqiptare dhe përfaqësimi i saj real politik, me 15% përfaqësim në lista dhe në organet drejtuese të partisë.
- Rritja e përfaqësimit të grave dhe vajzave nga 30% në 40% në strukturat e Partisë Demokratike.
- Ngritja e Komisionit të Seleksionimit të Kandidaturave për deputetë dhe kryetarë bashkie, si strukturë autonome përpara procesit të primareve.
- Përmirësimi i organizimit bazë të partisë, përfshirë grupseksionet dhe nëndegët, si dhe forcimi i rolit të Kolegjit të Kryetarëve të Grupseksioneve.
- Forcimi i marrëdhënieve mes degëve të partisë dhe të zgjedhurve vendorë në këshillat bashkiakë.
- Njohja e statusit të barabartë për të gjitha organizatat partnere të PD-së, duke respektuar historinë e themelimit të Partisë Demokratike të Shqipërisë.
- Mbrojtja e të dhënave personale të anëtarëve të partisë.
- Saktësimi i rregullave për shkarkimin e kryetarëve të degëve, duke garantuar më shumë siguri dhe qëndrueshmëri në detyrë.
