Ish-kryeministri Sali Berisha refuzoi ofertën që bëri kryetari i grupit të PD-së, Enkelejd Alibeaj me qëllim bashkimin e partisë përmes një platforme që në krye të pikave kishte anulimin e procesit të riorganizimit që ka nisur lideri historik i së djathtës shqiptare. Sali Berisha tha sot se Alibeaj merr urdhra nga Rama përmes Lulzim Bashës
“Edi Rama lot me fasadë. Pas vendimit të gjykatës së Tiranës të shtyrë tre muaj ose më shumë njeriun e parë që kam takuar dhe kam shtrirë dorën, ka qenë kryetari i grupit Enkelejd Alibeaj dhe deputeti Gaz Bardhi për të dhënë mesazhin e shkëputjes nga një periudhë. Njeriu që e krijoi u largua duke marrë të gjitha përgjegjësitë.
Por kjo ofertë gjeti refuzimin e zotit Alibeaj. Ai jo vetëm refuzoi ofertën, por i urdhëruar nga Rama përmes Bashës, sikur e shprehu vetë në Shkodër Basha, paditi PD-në në gjykatë. Tani më lejoni t’u bëj me dije se padija e tij është nul sepse nuk kanë qenë palë.
Për këtë arsye i thash Alibeajt se për ne nuk je më kryetar i grupit, ke bërë një shkelje shumë të rëndë, ke paditur PD-në. A mund të pretendohet të paraqesë një platformë një bashkëpunëtor i ngushtë i Ramës? Kjo nuk mund të pranohet” tha ai.
