Mesnatën e sotme skadon afati që kryetari i KQZ-së i vendosi PD-së zyrtare me Lulzim Bashën kryetar që të dorëzojë brenda 48 orëve dy dokumente për t’u regjistruar në zgjedhjet e 14 Majit.
Së pari një autorizim të freskët, ku të përmendet që bëhet fjalë për zgjedhjet e 14 Majit konkretisht dhe së dyti deklaratën solemne që kanë detyrim të firmosin të gjithë kryetarët e partive.
Deklarata solemne përmban angazhimet mbi zbatimin e ligjit dhe, sipas Ilirjan Celibashit duhet të nënshkruhet nga kryetari i partisë, në këtë rast nga zoti Lulzim Basha dhe jo nga i deleguari i tij, Alibeaj.
Nëse nuk plotësojnë dy kushtet, Celibashi tha se nuk do ta regjistrojë PD-në në zgjedhje. Por Enkelejd Alibeaj ka sfiduar KQZ-në duke thënë se nuk do të plotësojnë asgjë në dokumentacion dhe se do ta ankimojnë vendimin në KAS dhe më pas beteja pritet që të vazhdojë në Kolegjin Zgjedhor.
“Ne i kemi plotësuar detyrimet tona lidhur me regjistrimin dhe presim që KQZ të zbatojë ligjin, dhe të regjistrojë Partinë Demokratike në zgjedhjet vendore”, tha Alibeaj.
