Presidentja e Kosovës, Vjosa Osmani ka folur për ndryshimin pozitiv në marrëdhënien e saj me kryeministrin Edi Rama.
Osmani është shprehur se pavarësisht dallimeve në disa çështje të caktuara, është me shumë rëndësi që shqiptarët të unifikojnë politikën e tyre të jashtme.
Ndër të tjera Presidentja ka deklaruar se Shqipëria është zëri i Kosovës aty ku shteti ynë nuk ka përfaqësim, dhe andaj thotë se shtetin shqiptar duhet ta konsiderojmë jo vetëm shtet simotër, por edhe aleat të fuqishëm në përballje me sfidat përpara.
“Me qëllim të shtyrjes përpara të prioriteteve tona, është shumë me rëndësi që shqiptarët në rajon të unifikojnë politikën e jashtme. Shqipëria është zëri ynë atje ku nuk kemi përfaqësim, ndaj pavarësisht dallimeve që kemi pasur në disa çështje, ne duhet të vazhdojmë të koordinohemi dhe ta konsiderojmë shtetin shqiptar jo vetëm shtet simotër, por aleat strategjik të fuqishëm në përballje me sfidat që i kemi përpara. Kosova duhet të vlerësojë e të fuqizojë më shumë se çdo herë tjetër aleancat e saj. Bashkëpunimi e bashkërendimi me ata që na qëndruan pranë në momentet më të rënda të historisë sonë është veprim në shërbim të shtetit. Shteti ynë i ka themelet e forta sepse qëndron mbi sakrificën e popullit tonë, por edhe mbi partneritetet që i kemi ndërtuar. Prandaj, bashkëpunimi me Shqipërinë në fuqizimin e shtetit të Kosovës është esencial”, ka thënë presidentja Osmani per Reporterin.
