Nga Brukseli, Edi Rama komentoi paktin me Italinë për të marrë emigrantët afrikanë për t’i strehuar në Shëngjin. Ai tha se situata në të ardhmen mund të dalë jashtë kontrollit dhe të bëhet katastrofike.
“E gjithë politika që prodhohet nga kjo çështje nuk po merret me shkakun por me simptomat dhe shkaku po bëhet gjithnjë e më shqetësues. Situata në të ardhmen e afërt apo afatmesme mund të dalin krejt jashtë kontrollit.
Shqipëria nuk ka asnjë fuqi këtu për të qenë ajo që jep zgjidhje, por jemi kontribuues modest dhe po qëndrojmë krah për krah me Italinë, që jemi fqinj që na ndanë veç deti dhe në këtë det po ndodhin gjëra dhe nuk mund të rrimë larg dhe të themi nuk ka lidhje me ne.
Ne nuk jemi shtete anëtare me BE-në dhe nuk na detyron asnjë marrëveshje apo angazhim që ju e quani “punë e pistë”, por është një punë shumë sfiduese dhe të mos e bësh sot mund t’i shkaktojë nesër BE-së dëme që nuk jam i sigurt që mund të parashikohen sa katastrofike mund të jenë” tha ai.
