Sali Berisha ishte pjesë e panelit ku u shpalos programi i Partisë Demokratike për Mjedisin.
Berisha në fjalën e tij tha se mjedisi sot është i dominuar nga interesa mafioze të klientelës qeveritare.
“Ajo që spikat në këto 12 vite është një rrokullisje e madhe. Është një injorim, është një pushtim nga mafia i këtyre fushave. Mjedisi është më i braktisur, më i kërcënuar se rrallë ndonjëherë në histori. Mjedisi është sot i tëri i dominuar, i manipuluar, i dëmtuar nga interesa mafioze të klientelës qeveritare.
Shqipëria që për disa rrethana mund të kishte mjediset më të lakmueshme në Evropë, ka kryeqytetin një ndër 10 më të ndotur të planetit. Me një betonizim të pandalshëm me asgjë, me një mashtrim të pafund, ku pretendojnë zyrtarët se kanë mbjellë 1 milionë pemë, kur në të njëjtën kohë kanë prerë mijëra të tilla. Kjo batërdi, kjo ndotje në qytetet tona, kjo është e njëjtë edhe në ujërat tona. Verën e kaluar nuk kishim asnjë flamur blu në dete dhe liqene”, tha Berisha.
Gjithashtu ai akuzoi qeverinë se i jep akses trafikantëve për të ndërtuar kulla.
“Qeveria bën sehir dhe u jep akses trafikantëve për ndërtimin e kullave, për shndërrimin e parave të drogës në beton”, tha Berisha.
