Policia greke ka arrestuar katër persona për përfshirje në vrasjen e Jorgos Moskouris, i njohur me nofkën “Thamnakia”, atentat i ndodhur më 24 prill 2025 në Halandri, Athinë. Mes të arrestuarve janë dy shtetas shqiptarë dhe dy grekë, të cilët dyshohet se kanë ofruar mbështetje logjistike për ekzekutorët e vrasjes.
Hetimet zbuluan se autorët kryesorë të atentatit mbeten ende në arrati dhe janë në kërkim nga policia. Vrasja e Moskouris lidhet me përplasje për kontrollin e kontrabandës së duhanit dhe aktivitete të tjera kriminale në zonë. Autoritetet greke njoftojnë se ekzekutimi u krye me profesionalizëm të lartë dhe ngjason me skemat e përdorura nga grupet kriminale të Europës Lindore në ngjarje të mëparshme mafioze.
Policia vijon hetimet për të identifikuar dhe ndaluar autorët e arratisur, si dhe për të zbardhur të gjitha lidhjet e mundshme të grupit me aktivitetet kriminale në vend.
