Kryetari i Partisë Demokratike, Sali Berisha, ka deklaruar në Kuvend se opozita mbështet fuqishëm investimet e huaja në Shqipëri, por sipas tij, vendi po përballet me mungesë të tyre gjatë viteve të fundit.
“Në 13 vite nuk ka asnjë investitor të huaj në tokën shqiptare. Në 13 vite, asnjë tender në Shqipëri nuk është fituar nga kompanitë evropiane. Ne besojmë se investimet e huaja janë të një rëndësie jetike. Gjatë kohës që qeverisëm ne, në Shqipëri u garantuan investimet më të mëdha të huaja; vetëm në fushën e energjetikës, 2 miliardë euro. Kaskada e Devollit, e Fanit. Përveç këtyre, nga viti 2008-2013, investimet e huaja varionin nga 1.2 në 1.4 miliardë euro. Çfarë ndodh tani? Unë jua them prapë juve, PD mbështet investimin e huaj dhe ju po largoni të vetmin investitor të huaj që ka mbetur në Shqipëri”, u shpreh Berisha.
