Autoritetet në Turqi kanë ndërmarrë masa të gjera sigurie dhe kufizuese në prag të samitit të NATO-s në Ankara, duke nxitur reagime dhe kritika nga organizatat për të drejtat e njeriut dhe lirinë e shtypit.
Sipas raportimeve, policia ka arrestuar 225 persona të dyshuar për lidhje me grupe militante, ndërsa në mesin e tyre ka edhe akademikë, mësues dhe aktivistë. Në të njëjtën kohë, në kryeqytet janë ndaluar tubimet publike, aktivitetet mediatike dhe një sërë eventesh të tjera, ndërsa janë vendosur rreth 40 mijë forca policore për garantimin e sigurisë.
Po ashtu, dhjetëra gazetarëve u është refuzuar akreditimi për të ndjekur samitin pa dhënë shpjegime, duke prekur edhe media kritike ndaj qeverisë së presidentit Recep Tayyip Erdoğan.
Organizata ndërkombëtare dhe përfaqësues të lirisë së medias kanë shprehur shqetësim, duke theksuar se këto masa kufizojnë të drejtën e informimit dhe lirinë e shtypit. NATO ka bërë të ditur se është në kontakt me autoritetet turke lidhur me çështjen e akreditimeve dhe rëndësinë e pjesëmarrjes së gazetarëve në ngjarje të tilla.
