Kryetari i grupit të PS-së, Taulant Balla ishte sot në SPAK në cilësinë e personit që ka dijeni lidhur me kallëzimin që ka bërë për kompleksin “Partizani”, privatizimin, ku akuzon Sali Berishën dhe ish-zyrtarë të tjerë.
“Unë kam qenë shpesh në këtë institucion për të denoncuar dhe kallëzuar. Besoj se SPAK do i shkojë në fund të gjitha këtyre akuzave, si për privatizimin e kompleksit “Partizani”. Kam bindjen që edhe nesër do të jem këtu, në derën tjetër, ku kam bërë një padi kundër Sali Berishës dhe besoj që ky standard duhet të vendoset nga të gjithë politikanët.
Në momentin që ndaj teje ngrihet një akuzë duhet ta adresosh. Çështjet për të cilat diskutova brenda do i mbeten sekretit hetimor. Jam thirrur si person që kam dijeni. U kam thënë fjalën djemve të BKH-së se nuk do të flas” tha Balla.
I pyetur për arrestimin e Dakos, Balla kërkoi nga SPAK-u që vendosë para drejtësisë edhe personat për të cilët ka bërë denoncime, mes tyre Sali Berisha. “Kryeministri ka qenë shumë i qartë në këtë aspekt. Dua të them diçka tjetër.
I kërkoj drejtësisë së re që kemi shumë besim që edhe këto çështjet që unë vij shpesh këtu, një ditë të mbyllen dhe personat që kam bërë denoncime të vihen përpara drejtësisë” tha ai.
