SPAK ka kërkuar së fundmi dënimi për arbitrin Qerim Ruçi; kapitenin e Përmetit, Bledar Hajredinin dhe ish lojtarin, Markelian Alinani.
Shkaku që SPAK ka kërkuar dënimin me burg të të treve është bërë rezultati i ndeshjes Selenicës dhe Përmetit. Ndeshja e luajtur në mars të 2020 është fituar nga Selenica me anë të një penalltie.
Pas përgjimeve ka rezultuar se ndeshja e futbollit ka qenë e paracaktuar.
Kërkesa e SPAK:
Markelian Alinani 3 vite e 6 muaj burg
Qerim Ruçi 2 vite e 6 muaj burg
Bledar Hajredini 2 vite burg
Akuzat për zyrtarët e futbollit:
Mbi dërgimin për gjykim të procedimit penal nr.102/4, viti 2021
Prokuroria e Posaçme Kundër Korrupsionit dhe Krimit të Organizuar, Tiranë, në bashkëpunim me policinë gjyqësore të Drejtorisë së Përgjithshme të Policisë së Shtetit, ka përfunduar hetimet paraprake për procedimin penal nr.102/4 të vitit 2021. Në përfundim të hetimeve paraprake, janë marrë të pandehur dhe dërguar për gjykim të pandehurit:
Markelian Alinani, akuzuar se ka kryer veprat penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim dhe “Paracaktim i rezultateve sportive”, në bashkëpunim, parashikuar nga nenet 245/1 paragrafi i parë dhe 25, 197/a/2 dhe 25 të Kodit Penal.
Qerim Ruçi, akuzuar se ka kryer veprën penale “Paracaktimi i rezultateve në garat sportive”, kryer në bashkëpunim, parashikur nga nenet 197/a, paragrafi i dytë dhe 25 të Kodit Penal.
Bledar Hajredini, akuzuar se ka kryer veprën penale “Paracaktimi i rezultateve në garat sportive”, kryer në bashkëpunim, parashikur nga nenet 197/a, paragrafi i dytë dhe 25 të Kodit Penal.
